DMR Minister leh NBCC hotute inkâwm

Disaster Management & Rehabilitation (DMR) minister Prof. Lalnilawma chuan October 16, 2026 khan Delhi Mizoram House-ah National Buildings Construction Corporation (India) chairman & managing director Dr KP Mahadevaswamy a kâwm a, leimin laka invenna leh chhiatna dâwl zo ruhrel din leh siam tura thawhho dan tur a sawipui.

DMR Minister chuan, Mizoramah fûr laiin lei a min ṭhin tih a sawi a, "Mihring nunna, kawngpui, hmunhma leh in pawimawh te, chenna hmun leh khawtlang inkalpawhna te a tichhe nasa ṭhin. Lei min hlauhawm laka invenna atan science thiamna hmanga zir chian a ṭul a, lirnghing leh chhiatna thleng thei thlir lâwka hmalak a ṭul," a ti.

Chhiatna thlen hnua siam thar tum aiin ṭha taka inven a ṭul thu sawiin Minister chuan, "Mihring nunna leh infrastructure pawimawhte humhim hi state-in a ngai pawimawh," a ti a; NBCC mithiamte hmangin lei min theihna hmun hriat chian te, leilung dinhmun leh lei ngheh zawng zir chian te, lei min hlauhawmna hmun tihchiana invenna tur siam te Mizoramin a mamawh thu a sawi.

Prof. Lalnilawma leh NBCC hotu hian Mizoram, tlang ram mil tura engineering leh technology thar hman theih dan tur te, retaining wall siam, gabion wall siam, soil nailing, rock bolting, slope stabilisation leh tuihawk luanna ṭha zawk siam chungchangte an sawi dun. National Landslide Risk Mitigation Programme hnuaia hmalakna hmasa atan dinhmun derthâwnga, leimin hlauhawmna hmun nia langte ngaih pawimawh hmasak ni se, an ti.

Minister ṭawiawmtu DMR secretary Sushil Singh chuan Mizoram dinhmun tlangpui a sawi a; hmalak mek te, harsatna tawhte leh chhiatna thleng thei laka inbuatsaihnaa Mizoram sorkar hmalaknate a tarlang. NBCC hotu dangte'n technical leh engineering lama thawhho dan tur ṭha nia an hriatte an sawi bawk.