KHAWTHLIR

Thisen pe

October 17, Inrinni khan kohhran ṭhalaite'n thisen unit 132 an pe. ṬKP, Chaltlang Bial chuan ZMCH tan thisen unit 53 pein, petute mipa 41 leh hmeichhia 12 an ni a; Evangelical Baptist Convention Church ṭhalai pawl Baptist Youth Fellowship chuan BYF Day pualin Civil Hospital, Aizawl tan unit 47 an pe a, petute mipa 35 leh hmeichhia 12 an ni. KṬP, Zotlang Branch pawhin Synod Hospital tan unit 32 an pe a, petute mipa 29 leh hmeichhia pathum an ni.

Panchayat Bhawan

Kanghmun South-a Panchayat Bhawan sak thar chu October 16, 2026 khan bialtu MLA V Malsawmtluanga, Lunglei High Powered Committee vice chairman-in a hawng. Panchayat Bhawan hi Rashtriya Gram Swaraj Abhiyan sum Rs 20,00,000 hmanga sak a ni.

MRB-in pik-up pe

Mizoram Rural Bank chuan corporate social responsibility kaltlangin October 17, Inrinni khan Sairang Branch YMA hnenah pik-up an pe. Lirthei hi MRB aiawhin chief manager Isaac Lalfamkima Sailo-in Sairang YMA Hall-ah a hlan a ni.

I kawtkaiah sorkar

Lunglei DC bultuma mipuite'n sorkar hmalakna hrang hrangte an chhawr ṭangkai theihna tura an khuaa kal chilha hmalakna, 'I kawtkaiah sorkar' (Prashasan Gaon Ki Ore) chu October 16, 2026 khan Lunglei RD Block chhunga Vanhne khuaah buatsaih a ni a; Vanhne leh a chhehvel khua aṭangin mi 160 velin sorkar department hrang hrangte an dàwr a ni.

Lehkhabu hralh ṭha

Mizo Writers Association-in Vanapa Hall-a Lehkhabu Pho Rûnpui an buatsaih mekah ni hnih chhungin Rs 4,32,987 man lehkhabu hralh a ni. Lehkhabu Pho Rûnpui hi October 16, 2026 khan ṭan niin, October 24 thleng awh tur a ni a; a ṭan ni-ah Rs 2,07,850 man hralh niin, a ni hnihnaah Rs 2,25,137 man hralh a ni. Chawhma dar 10 aṭanga tlai dar 6 thleng hawn thin a ni a, a tawp ní-ah zan dar 9 thleng hawn a ni ang.