Sorkar hnathawkte Sports Meet zo

Mizoram Civil Service Sports & Cultural Association chuan October 13-16, 2026 chhung khan Annual Sports Meet vawi 37-na an hmang a, October 16 khan Dawrpui Multipurpose Hall-ah khârna hun hman niin, minister of state B Lalchhanzova'n a hmanpui.

B Lalchhanzova chuan, sorkar chak tak nei turin mi tin an pawimawh thu a sawi a; lawm tak leh hlim taka an mawhphurhna ṭheuhte rim taka thawka hlen chhuak turin sorkar hnathawkte a fuih.

Annual Sports hi Mizoram sorkara department hrang hranga thawkte'n thawhhona leh inlungrualna ṭha zawk an neih theihna tura buatsaih a ni a; infiamna chi ruk - badminton, table tennis, carrom, tennis, chinese checker (hmeichhia) leh chess-ah te an intihsiak a, hnam lâm hmangin an intihsiak bawk.

Mizoram hmun hrang hrang aṭangin sawrkar hnathawk mi 1,400 vel an tel a, an tel theihna turin GAD chuan special casual leave Aizawla mite ni li leh Aizawl pawna mite ni nga a pe. Mizoram Police (Unarmed) pakhatna an ni a, School Education department pahnihna niin, Public Works Department pathumna an ni.