Loneitu entawn tlak chawimawina B Lalṭhuami, Serchhipin a dawng

B Lalṭhuami, Serchhip P&E Veng chuan October 15, 2026 khan Ministry of Agriculture & Farmers Welfare-in New Delhi-a 'Mahila Kisan Diwas' an hmannaah loneitu entawn tlak chawimawina a dawng.

Mahila Kisan Diwas hi International Year of Woman Farmer pualin hman a ni a, India ram state hrang hranga hmeichhia, loneitu entawn tlak mi 30 thlan chhuah hnenah chawimawina hlan a ni. Mizoram aṭangin B Lalṭhuami'n chawimawina a dawng a, ani hi Agricultural Technology & Management Agency (ATMA), Serchhip kaltlangin thlan a ni.

B Lalṭhuami hian loneih, huan thlai siam leh ranvulhah sûlhnu ṭha tak a nei a, self help group kaltlanga hmeichhia loneitu dangte kaihhruai leh zirtirna kawngah pawh a thawh hlâwk hle. A hnathawhte chu Mizoram mai bakah, ram pum huapa entawn tlak a nih avangin chawimawina dawng turin thlan a nih thu sorkar thuchhuahin a tarlang.