Khawvel huapa chawimawina dawngtu Horticulture Minister-in lawmpuina a hlân

'FAO 100 Women Heroes in Agrifood Systems and Rural Deve-lopment' chawimawina dawngtu ZT Lalrithangi w/o F Zabiakliana, Sangau chu Horticulture minister C Lalsawivunga'n nimin khan a pisaah lawmpuina thilpek a hlan a; sorkarin kut hnathawktute tan nasa taka ṭan lak zel a tum thu a sawi.

ZT Lalrithangi hian strawberry chìnah a hlawhtlin avangin October 16, 2026 khan World Food Forum 2026, FAO Headquarter, Rome, Italy-ah khawvel huap chawimawina, 'FAO 100 Women Heroes in Agrifood Systems and Rural Development' chawimawina a dawng a; ani bakah India aṭangin Priyanka Mahesh Shelke, Maharashtra-in a dawng bawk.

Horticulture Minister chuan, khawvel pum huapah Mizote theuneu lohzia tihlan a ni tih a sawi a, "Mizo nu, mahni tuinaa theihtawp chhuaha khawvel pum huap chawimawina hial dawng thei kan nei hi kan chhuang hle. Pi Lalrithangi thawhrimna leh a lawmman dawn hi Mizo hmeichhiate chona thar petu ni ngei se ka duh," a ti.

C Lalsawivunga chuan, sorkarin kut hnathawktute a ngaih pawimawh thu sawiin, "Kut hnathawktute hma hai kuakpui turin a theihna zâwnah nasa taka ṭan lak zel a tum a ni," a ti a; ZT Lalrithangi chu a kal zelna turah duhsakna a hlan.

Lawmpuina inkhawm hi Horticulture director CH Lalmuanpuia'n a kaihruai a, ZT Lalrithangi leh department bakah, ministry lama hotute'n hma an lak dante an tarlang.