Bible tidanglama sumdawnna atana hmangte tih tawh lo turin BSI-in a ngen

Bible Society of India (BSI), Aizawl Auxiliary chuan, BSI tihchhuah Bible tidanglama sumdawnna atana hmangte leh BSI aṭanga phalna la loa Bible hmanga mobile application siamte chu ti tawh lo turin an hriattir.

BSI, Aizawl Auxiliary chuan nimin khan thuchhuah (circular) an tichhuak a; BSI-in a tihchhuah Bible ṭhenkhat chu siam danglama sumdawnna atana hmang an awm thu leh, phalna mumal la loa Bible mobile application siam an awm thu an tarlang.

"Pathian Lehkhabu Thiang-hlim (Bible) hi Kristiante thurin innghahna, kohhran hote'n kan zah leh kan serh em em lehkhabu thianghlim a ni a, sumdawnna atana mahni thua lo siam danglam emaw, phalna fel tak la loa lo tihchhuah ve emaw a rem lo a ni," BSI chuan a ti.