KHAWTHLIR

Thlai chi sem

Champhain South bialtu MLA Lt Col. Clement Lalhmingthanga hmalaknain nimin khan Champhai Tuipuiah thlasik thlai - broccoli leh párbâwr sem a ni. Thlai semnaah hian ATMA, Champhai district-a mithiamte'n broccoli leh parbawr enkawl dan, eichhe thei rannung laka ven dan an zirtir nghal. Hmun dangah pawh an mamawh ang zelin broccoli leh parbawr chi sem chhunzawm tum a ni.

Saturation campaign

Aizawl bawrhsap Lalhriatpuia hoin nimin khan October 21 - December 31, 2026 chhunga 'Saturation Campaign of Financial Inclusion Schemes' kalpui dan tur sawiho a ni. Campaign hi October 21, 2026 khian Aibawkah a ni dawn a, financial inclusion scheme hrang hrang - PMJDY, PMJJBY, PMSBY leh APY chungchang inhrilhfiah a ni ang.

Lawngtlai dist-ah Job card 43,498

Lawngtlaia Rural Development pisa bultumin nimin khan DC conference hall-ah VB-GRAMG hmalakna thlirho a ni a, bawrhsap Donny Lalruatsanga'n a hmanpui. Tarlan danin, Lawngtlai district-ah VB-GRAMG card 43,498 siam a ni tawh a, active job card 42,992 a awm. April-September 2026 chhungin Lawngtlai leh Chawngte RD Block-ah ni 67 ve ve, Sangau leh Bungtlang South RD Block-ah ni 63 ve ve inhlawhna siam a ni.

Beti Bachao Beti Padhao sawiho

Aizawl District Hub for Empowerment of Women hnuaia District Level Implementing Committee chu nimin khan Aizawl additional DC Zoramsiama Hmar hoin an ṭhukhawm. Beti Bachao Beti Padhao kaltlanga hmalakna hrang hrangte sawiho a ni a, awareness campaign neih dan tur leh inzirtirna kalpui dan tur an rel a ni.

Leiṭha man

Seling Out Post-a duty police-te chuan October 18, Pathianni khan truck pahnih - MZ-01 S-7962 leh MZ-01 F-2697 aṭangin leiṭha (urea) ip 300 ve ve an man a, Agriculture department hnenah an hlan. Leiṭha an mante hi a vaiin ip 600 a ni a, Rs 18,00,000 hùa chhût a ni.