JJM 1.0-a tih turte ti zo vek tawh

State Water and Sanitation Mission Apex Committee chu nimin khan an ṭhu a, chief secretary Khilli Ram Meena-a'n a kaihruai. Chhungkaw tin hnena tui thinghlim pekna tura sorkar laipuiin a duan Jal Jeevan Mission (JJM) 1.0-ah Mizoram sorkarin a tih turte a tih vek tawh thu tarlan a ni.

JJM (Dashboard)-in an tarlan danin, JJM 1.0 kaltlangin Mizorama chenna in (household) 1,33,060-ah tui herh haw theih (tap water supply) pek a ni tawh a; India rama JJM kalpuina state/union territory 34 zingah zo vek tawh (100% zo tawh) state/UT 11 zingah Mizoram a tel.

Ṭhutkhawmah hian, JJM kalpui ṭan aṭangin a thawh khatnaa scheme 852 (cheng vbc 1,438.22) chu kum 2024 khan zawh vek a nih tawh thu an sawi a ni a; mahse, kum 2024-25 khan sorkar laipui aṭangin sum hmuh a nih loh avangin financial progress 100% a la ni thei lo tih tarlan a ni.

JJM thawh hnihna (JJM 2.0) atan October 13, 2026 khan Mizoram chuan sum sanction a hmu tawh. Sum kal dan turah JJM 1.0 leh JJM 2.0-ah danglamna a awm thu leh, harsatna awm theite tarlan niin, sorkar laipui aiawhte chuan hma an lo lak tur thu an sawi.

Ṭhutkhawm hi sorkar laipuia Ministry of Jal Shakti aiawh officer-in biakhmuh theihna (video conferencing)-in a chhim a; Rural Development & Administration, Health & Family Welfare, Planning, School Education, IPR leh Finance department secretary-te bakah, Nation-al Jal Jeevan Mission-a mission director-te an tel a ni.