Pathianni-ah dan bawhchhia 188 man

Aizawl Traffic Police chuan October 18, Pathianni chawhnu lam khan Aizawla hmun hrang hrangah Special Drive neiin lirthei tlan chhuakte an endik leh a, lirthei dan bawhchhia mi 188 an man.

Traffic Police tarlan danin, Special Drive hi lirthei hmanga dan bawhchhiatna titlem tur leh lirthei chetsualna thleng ṭhin venna atana tih a ni a, chawhnu dar 2:45-ah ṭan a ni. Lirthei dan bawhchhia mi 188 man zingah helmet khum loa two wheeler khalh tam berin, mi 110 an ni.

Dan bawhchhia an man langsar zualte chu - helmet khum loa two wheeler khalh mi 110, driving license nei loa lirthei khalh mi 47, two wheeler-a phal chin aia tam inphur mi pasarih, lirthei ri bengchheng mi pathum, kum tling loa lirthei khalh mi pahnih, rûi chunga lirthei mi pakhat an ni. Helmet dik lo khum, phal loh zawng (wrong side)-a tlân, rear view mirror (side glass) vuah lo leh chhan dang vanga man an awm nual bawk.

Aizawl Traffic Police chuan, "Kan khawpui a lo him a, thlamuang taka kan kawngpuite mi tinin kan hman tlân theih nan Special Drive hi a ṭul anga kalpui zel a ni ang," an ti a; dàn zawm kawngah ṭan la thar turin mipui an ngen.