Naga zirlaite'n Freshers’ Meet an hmang

Naga Students’ Union, Mizoram (NSUM) chuan nimin khan Berawtlanga Art & Culture Auditorium-ah Freshers’ Meet cum Cultural Day vawi 28-na a hmang a; adviser to chief minister Dr KC Lalmalsawmzauva khuallian niin, Remlalliana Hnamte, MCS khualzahawm a ni.

Dr KC Lalmalsawmzauva chuan, lehkha zir lai chu mi puitling ni tura inbuatsaihna hun a nih thu sawiin, "Zirlaite hi kan thil tumah kan chian a, kan tum ram thleng turin ruahmanna kan siama kan inbuatsaih a pawimawh," a ti.

Adviser to CM chuan, zirlaite chu hlawhtlinna aṭang chauh ni loin, hlawhchhamna aṭang pawhin zir tur tam tak a awm tih hre turin a chah a; hna an thawh tum te, chhungkua din an tum dan te chiang taka ngaihtuah tura chahin, huaisenna leh dawhtheihna nei a, an hun tawng mil zela insiamrem thiam turin a fuih a ni.

Remlalliana Hnamte chuan, Naga-te hi hmarchhak mi zingah chuan mi kawm thiam leh hawihhâwm an nih thu sawiin, "An hnen aṭangin Mizote'n zir tur tam tak kan nei. Mizo leh Naga khawtlanga intluktlanna kan neih thin kha politics boruak inlumletin a tidanglam a, khangte kha neih lêt vek theih ni tawh lo mah se, vawina zirlai, naktuka ram hruaitu leh officer ni turte hian dikna leh rinawmna nen eng emaw chen kan siamtha leh thei a ni," a ti. Mizorama an awm chhungin Mizo tih dan ṭhate zir chhuak turin a chah bawk.

Inkhawmah hian NSUM president Eno Kelengulie Kenguruse pawhin thu a sawi a; Central YMA aiawhin CEC member Lalnunfela Hlawndo-in thu a sawi bawk a ni.