CYMA-in mi kut tuara thi pawi ti

Central YMA chuan, Ngursangzuol Sanate (40) s/o Thanghlira Sanate (L), mi kut tuara a thi chu pawi an tih thu sawiin, ruihhlo dotute tana harsatna siam záwnga chete chu CYMA-in a hmachhawn zel dawn thu an tarlang.

Ngursangzuol Sanate hi Sakawrdai Hmarveng Branch YMA-a Z Section information secretary a ni a, October 16, 2026 khan Sakawrdai mi tho RC Lalropuia, HPC(D) mi leh sain Manipur lamah a hruai. October 17, 2026 khan Lungthulian ram, Rawvakawt zaua Ramdinglien thlâmah Ngursangzuol chu thia hmuh a ni a, a taksaah hliam a awm nual a ni.

CYMA chuan, mi kut tuara Ngursangzuol Sanate a thi chu pawi an tih thu leh a chhungte an tawrhpui thu tarlangin, "He thihnaa inhnamhnawihte'n an phu tâwk hremna an hmuh ngei theih nan CYMA chuan hma a la zel dawn a ni," an ti a; tun hnuah tualthahna thleng tawh lo se an duh thu an tarlang.

YMA-in ram pum huapin Ruihhlo Do kumpuan a kalpui meka tih sawiin CYMA chuan, "Theihtawpin hmalak mek zel a ni. Ruihhlo do kawngah hian a dodal zawng emaw, ruihhlo dotute tana harsatna siam zawnga chete chu eng ang mi pawh ni se CYMA chuan a hmachhawn zel ang," an ti.