Chief information commissioner atan H Lalengmawia, IAS (Rtd) lak luh a ni

H Lalengmawia, IAS (Rtd.) chu Mizoram chief information commissioner (CIC) atan larsap Gen. Dr Vijay Kumar Singh-a'n nimin khan rinawmna thu tiamtirin a la lut.

Mizoram Information Commission CIC lak luhna inkhawm hi Lok Bhavan Durbar Hall-ah buatsaih a ni a; chief secretary Khilli Ram Meena-a'n Larsapin CIC atana H Lalengmawia a ruatna notification a chhiar hnuah Larsap chuan rinawmna thutiam sawitirin CIC atan a la lut a ni.

CIC thar lak luhna inkhawmah hian minister pathum - Vanlalhlana, C Lalsawivunga leh Lalthansanga te, opposi-tion leader Lalchhandama Ralte leh mi pawimawh dangte an tel.

H Lalengmawia hi Kawrtethawveng chhuak niin, North Eastern Hill University aṭangin MA (Public Administration) a zo a, gold medalist a ni. NEHU-ah kum thum chhung lecturer a nih hnuah kum 1991 khan Mizoram Civil Service a zawm a, an batch-ah pakhatna a ni. March 19, 2014 khan Indian Administrative Service-ah hlankai niin, 2005 batch AGMUT cadre pek a ni a, November 30, 2025 khan superannuation pension-in a chhuak.

Mizoram sokarah hna pawimawh tak tak a tawk tawh a; Joint Chief Electoral Officer, State Protocol officer, School Education director, Champhai leh Kolasib district bawrhsap te a ni tawh. Commisioner a thleng. State sorkarah secretary niin, Home, Environment, Forests & Climate Change, Health & Family Welfare, Power & Electricity leh Higher & Technical Education department-te a enkawl tawh a ni. Official duty-in Sri Lanka, Norway, United Kingdom leh Thailand-ah te a kal tawh bawk.