Police thite hriatrengna hun hmang Mizoram Police-ah nunna hlantu 54 awm

Nimin khan India ram pumah police thite hriatrengna leh sûnna hun, Police Commemoration Day hman a ni a, Mizoramah pawh hmun hrang hrangah police-te'n an hmang. Mizoram Police zingah ram leh hnam tana nunna hlan mi 54 an awm tawh.

Aizawla Police Commemoration Day hmanna pui ber chu zing dar 7-ah 1st MAP hmunpuia Martar Thlânah hman a ni a; Director General of Police leh police officer dangte'n police martarte sûnna hun hmangin martar hriatrengna lungphunah pangpar an dah. District headquarters leh police battalion dangah te hun hman a ni bawk.

October 21, 1959 khan DCIO Karam Singh leh a hote, 3rd CRPF mi tlemtê chu Ladakh-a Hot Springs area-a an duty laiin China sipaite'n an lo lambun a, CRPF mi 10 an thih bakah, mi dang pasarih an hliam. Police (CRPF) 10-in ram tana nunna an hlan ní, October 21 chu kum 1960 khan Police Commemoration Day-ah puan a ni a, police, ram tana nunna hlantute hriatrengna leh sûnna ní atan kum tin hman ṭhin a ni.

September 1, 2025 leh August 31, 2026 inkar khan India ramah police mi 154-in ram leh hnam tan nunna an hlan tih tarlan a ni a, Mizoram Police zingah erawh chuan duty laia thi an awm lo. Kum 1966 aṭanga nimin thleng khan Mizoram Police zingah ram leh hnam tana nunna hlan mi 54 an awm tawh thung.

Nimina National Police Memorial, Delhi-a Police Commemoration Day hmannaah Union Home minister Amit Shah chuan Motorcycle Rally a vailiam. Rally-a telte hi October 31, 2026 khian Kevadia, Gujarat-a Ekta Parade-ah an tel dawn a; Mizoram Police aṭangin mi pariat telin, October 6 khan Aizawla Police Headquarters aṭangin DGP Sharad Agarwal-a'n a vailiam a ni.