Silchar YMA hnenah ambulance pe

Central YMA chuan ambulance an hman lai, Mahindra Supro MZ-01 Z-2369 chu Cachar biala Mizo mipui mamawh phuhrûkna atan nimin khan Silchar Branch YMA hnenah an hlan.

Lirthei hlanna inkhawm hi Central YMA Hall-ah hman a ni a; inkhawm kaihruaitu CYMA president R Lalngheta chuan, CYMA-in ambulance dang an neih belh avangin, ambulance an kawl lai chu Cachar leh a chhehvela Mizo mipui leh damlo phurh ngaite tana ṭangkai zawka hman a nih theih nan Silchar Branch YMA hnenah an hlan thu a sawi.

Ambulance inhlannaah hian CYMA leh Silchar Branch YMA te chuan inremna an ziak a; CYMA aiawhin president R Lalngheta leh Silchar Branch YMA aiawhin president K Vanlalhriata ten hming an ziak a ni.