KHAWTHLIR
Rorel inkhawm
YMA Rorel Inkhawm vawi 5-na chu vawiin hian LPS Arena, Aizawlah neih a ni dawn a, chawhma dar 10:30-ah ṭan tur a ni ang. Agenda lutte ngaihtuah a nih dawn bakah, YMA branch anga hmalaknaa ti ṭhate hnenah lawmman hlan a ni dawn a; Asian Games 2026-a hockey-a champion team-a tel Lalremsiami Hmar leh Lalthantluangi te chawimawina hlan an ni ang.
Heroin man
Saitual police-te chuan October 20, Thawhlehni zing dar 5:40 vel khan Keifang Kualmawiaah Manipur aṭanga Aizawl pana tlan Brezza car AS-11 T-8278 aṭangin heroin kg 1.457 an man a; cheng nuai 291.4 hùa chhût a ni. Lirthei khalhtu Thangminlun Baite (24), Kangpokpi district, Manipur man nghal niin, Saitual Police Station-ah thubuai ziah luh a ni.
Lui dung humhalh
Champhai College leh District Fisheries Development Office ṭang dun chuan nimin khan Champhai College-ah lui humhalh inzirtirna, Mizoram Luidung Humhalh Riverine Conservation Awareness Campaign an buatsaih a; Keilungliah leh a chhehvela thenfai hnatlang an nei nghal.
Chána chi sem
Agriculture dept chuan nimin khan Lungleia an pisaah thlasik thlai chi sem inkhawm an buatsaih a; Lunglei West bialtu MLA T Lalhlimpuia'n loneitute hnenah chána chi semin, ZPM sorkarah loneitute'n thlai man hre sain hma an la thei ta tih a sawi a, "Thlai panga a man hre sain kan chíng tawh a, thlai tam zawk a man hre saa chin theih tur ngaihtuahin sorkarin hma a la leh mek a ni," a ti.
Damdawi-in himna
Lawngtlai District Disaster Management Authority chuan nimin khan DC conference hall-ah damdawi-in himna chungchang zirhona an buatsaih a, DC Donny Lalruatsanga a hmanpui. Zirhonaah hian Lawngtlai Chief Medical Officer bakah, District Hospital, Christian Hospital, Lairam Christian Medical Centre leh Nursing School-a hotute leh thawktute an tel a ni.