Financial Saturation Campaign hawn a ni

Nimin khan Aibawk, Lawngtlai leh Khawzawlah te ‘Saturation Campaign of Financial Inclusion (Fi) Schemes at Gram Panchayat Level’ hawn a ni.

Aizawl district tana ‘Saturation Campaign of Financial Inclusion (Fi) Schemes at Gram Panchayat Level’ hawnna hawnna chu SLBC buatsaihin Aibawka BNRGSK Hall-ah neih a ni a, Aizawl SDC Shivani Mohan-i'n a hawng.

Inkhawm hi Reserved Bank of India (RBI) general manager T Lhungdim-in a kaihruai a, SLBC convener leh SBI regional manager Muanzova Duhlian-in khua leh tuite tana bank-te kaltlanga hamṭhatna scheme hrang hrangte a sawifiah. MRB senior manager V Lalrinmawia'n saturation campaign chungchang a sawi.

Aibawk VC president Lianhmingthanga bakah, YMA, MHIP leh MUP aiawhte pawhin thu an sawi a; hawnna inkhawm zawhah zawhna leh chhanna hun hman a nih bakah, mipui tan bank account hawn leh insurance-a inziah luh theihna hun bank hrang hrangte'n an buatsaih nghal a ni.

Lawngtlaiah chuan lead bank SBI huaihawtin bawrhsap Donny Lalruatsanga'n Lawngtlai Bethel Veng Anganwadi Centre kawtah Financial Inclusion Saturation Campaign a hawng.

Inkhawmah hian Bawrhsapin thu a sawi bakah, SBI manager PC Lalchuailova'n sorkar laipui scheme pawimawhte a sawifiah a; zawhna leh chhanna hun hman a nih bakah, a duh tan PMJDY, PMSDY, PMJJBY leh APY-ah te account hawn hun siam a ni.

Khawzawlah chuan bawrhsap K Vanlalṭhiana'n DC conference hall-ah Saturation Campaign a hawng a, khawtlang hruaitute an tel.

Saturation Campaign hi December 31, 2026 thleng awh tur a ni a, RD block hrang hrangah neih a ni ang. Campaign chhungin Pradhan Mantri Jan Dhan Yojana (PMJDY), Pradhan Mantri Suraksha Bima Yojana (PMSDY), Pradhan Mantri Jeevan Jyoti Bima Yojana (PMJJBY) leh Atal Pension Yojana (APY) chungchangte mipui an hrilhfiah dawn a ni.