Ruihhlo simte tan thiamthil zirna ṭan

Serchhip DC office leh Mizoram Building and Other Construction Workers Welfare Board (MBOCWWB) chuan nimin khan NMBA Chhanchhuahna Camping aṭanga ruihhlo simte pualin 'Skill Development & Livelihood Reintegration Programme' an buatsaih a, district bawrhsap Paul L Khuma'n a hmanpui.

February 2026 khan Serchhipah ruihhlo ngai pual camping buatsaih a ni a, mi 500 vel an lut. Camping aṭanga ruihhlo sim zui zelte zinga mi 21-te tan Skill Development Training buatsaih a ni a, Serchhipa IPR department hall-ah ni 13 chhung electric wiring chungchang zirtir an ni dawn a ni.

Serchhip Bawrhsap chuan, NMBA camping leh ruihhlo donaa Serchhip mipui, VC, pawl leh kohhrante thawhhona a ṭhat thu a sawi a, "NMBA camping leh skill training hi mi pakhat tal pawh chhanchhuah an nih theihna tura hmalakna a ni a, trainee mi 21 an awm thei hi a lawmawm. Mi tinin hringnunah sual do kan nei vek a, ruihhlo sim tate hi an hmelma hnehtu pasalṭha an ni," a ti.