Nurse zir chhuakte thlahna hun hmang

Nursing School, Lunglei chuan nimin khan 29th Batch Graduation leh 32nd Batch Lamp Lighting an hmang a; Lunglei Municipal Council (LMC) chairman Lalzuithanga khuallian a ni a, Lunglei High Powered Committee (HPC) vice chairman V Malsawmtluanga, MLA pawhin a hmanpui.

Lalzuithanga chuan, nurse-te chu mite tana inpekna nun leh mi harsa, mangang leh ṭanpui ngaite chhan chhuak a, chhawmdawl a, tidamtu an nih thu sawiin, "Ṭanpui duhna nun kengtu in ni a, khawngaihna ni ngawt loa hmangaihna nun chhuahpuitu in ni," a ti a; nurse-te chezia leh ṭawngkam chu damna leh natna thlen thei a nih avangin mite tan damna, hlimna leh lungawina thlentu nih tum turin a chah.

V Malsawmtluanga chuan, a nu nurse a nih avangin nurse rawngbawlna hlutzia hmuhpuitu leh hriatpuitu a nih thu a sawi a; nurse rawngbawlna a ngaihhlutzia lantir nan leh zirlai chhuakte chu nurse ṭha tak ni tura fuihna atan a sum senga a ruahman 'V Malsawmtluanga Award' chu nurse zirlai ti ṭhate hnenah a hlan.

Graduation & Lamp Lighting-ah hian Christian Hospital School of Nursing principal Vanlalthlengliani kaihhruaiin zirlaite'n bati chhiin thu an tiam a; Mizoram Nursing Council (MNC) Examination 2026-a top 10-a langte hnenah chawimawina hlan a ni. Nurse zir zote hnenah certificate hlan a ni bawk.

Nursing School, Lunglei hi December 17, 1995-ah din a ni a; Indian Nursing Council-in phalna a pek angin GNM zir tur kum tin mi 20 lak ṭhin niin, tun thlengin zirlai 500 chuangin an zir chhuak tawh a ni.