Dan loa quarry neite zawn chhuah an nih theih nan MQA-in hma la

Mizoram Quarry Association (MQA) chuan nimin khan Zarkawt Community Hall-ah General Assembly vawi 3-na an hmang. Dan loa quarry nei (illegal miner)-te zawn chhuah an nih theih nan Directorate of Geology & Mining nen hmalak mek a nih thu an tarlang.

MQA General Assembly hi senior vice president C Lalnunthanga'n a kaihruai a, president C Laldinfela'n thu a sawi. General secretary PC Lalrinsanga tarlan danin, mining permit leh explosive permit hun inmil loh vanga harsatna sutkian nana mining permit zawng zawng February thlaa thi a, March-a nung tura sorkara an thlen chu tihhlawhtlin a ni tawh a; explosive license renew dawnin PWD aṭangin NOC lak nawn a ngai tawh lo.

Inkhawmpuiah hian kum 2026-2028 chhunga an pawl hruaitu tur an thlang a, president atan C Laldinfela leh general secretary atan PC Lalrinsanga te an thlang. MQA hi Mizorama quarry neitute'n September 6, 2022-a an din a ni a, member 106 an awm mek a ni.