FCSCA Minister-in HPCL hotute a kâwm

Food, Civil Supplies and Consumer Affairs (FCSCA) minister B Lalchhanzova chuan nimin khan Guwahati Mizoram House-ah Hindustan Petroleum Corporation Limited (HPCL) hotute a kâwm a; Mizoramah tuialhthei chhêk khawlna (oil depot) siam tura hma an lak dan a sawipui. Inkawm zawhah Betkuchi-a HPCL oil depot a tlawh.

B Lalchhanzova chuan, HPCL-in Mizoramah oil depot an neih ngei theih nan an um zel thu a sawi a, "Kan hmalaknate'n rah ṭha a chhuah ngei theih nan kan theihna zawng zawngin kan bei zel dawn. HPCL bakah IOCL lamte nena oil depot siam tura indawrna a la kal ve zel a, Chief Minister remtihnain oil depot siamna tur hmunhma pawh oil company-te hnenah man awm loa pek mai theih beisei a ni," a ti.

Mizoram chu tlang ram a nih avangin state dangte hmasawn rualin hma an sawn chak lo bik tih sawiin Minister chuan, oil company-te chu hlâwk tumna aṭang ringawta thil thlir lo a, Mizoram mamawh tihsak chu an tan pawh malsawmna dawn belhna tur a ni tih hriaa hma la turin a chah.

FCSCA Minister chuan, Mizoram chhim lama sumdawnna kawng inhawng mek en chungin chhim lamah pawh oil depot hawn belh zel dan thlithlai turin HPCL hotute a chah a, "India ram himna tur en tel chunga a rang thei ang bera Mizoramin oil depot a neih hi ram hmangaihna avang pawhin tihmakmawh a ni," a ti.

B Lalchhanzova chuan, Mizoram hmar lamah ram acre 5 vela zau an lo zawng ang a, kumin chhungin enhoa tihfel a duh thu HPCL hotute a hrilh bawk.

Inkawmnaah hian HPCL aiawhin general manager (operations) Gurubachan Singha, CRM Rahul Kumar Singh leh DGM Ratul Bora te an tel.

Mizorama oil depot siam a nih theih nan hian HPCL, Kolkata oil terminal chu Supply Minister hian July 12, 2024 khan a lo tlawh tawh a, inbiakna thui tak kalpui tawh a ni.