MNF-in an din champha 65-na an lawm; 'ZPM an lungrual hleithei lo' - Zoramthanga

MNF party chuan nimin khan Mizoram hmun hrang hrangah an din champha vawi 65-na an lawm. Aizawlah chuan Mizo Hnam Rûnah lawm a ni a, thusawitu MNF president Zoramthanga chuan, ZPM chu an lungrual hleithei lo niin a sawi.

Zoramthanga chuan, ZPM kaihhruai sorkar chungchang sawiin, "Kan ram kaihruai tura mipui enchhin mek ZPM sorkar chuan movement wave na tak nen bul rawn ṭanin Mizoram min kaihruai a, pui hrang hrang nei awm khawm, hrâm dan pawh chi hrang hrang nei an nih avangin an lungrual hleithei lo a, an chêt dan a hmuhnawm ṭan viau a ni," a ti.

MNF chu hram dan inang, Pathian leh kan ram tan titu, thuthlung khat inang vuantu an nih thu sawiin Zorama chuan, "Kan innghahna lungphûm kan Pathian hi a rinawm. Thinlunga amah kan vawn tlatna hi Lalpa'n tlingah min pawmsak," a ti a, beihna nasa tak leh nêkbehna karah pawh Pathianin MNF a tundin leh ṭhin thu a sawi.

MNF President chuan, MNF chu mihring ngaiha mi tláwm tak takte din leh bul ṭan ni mah se, hotu hmasate'n Pathian hming lam chunga Mizo hnam thuthlung chi an tuh chu a ṭhang duang zel niin a sawi a, "A ral ve lo a, a tlu ve hek lo. Tling lo tak chung pawha 'Pathian leh kan ram tan' kan tih tlatna hi Pathianin mal a sawm a, Mizorama political party lian ber leh nghet ber a la ni ta zel a ni," a ti.

Mizoramah hian political party leh movement lian tak tak an dingin tawh ṭhin tih sawiin Zoramthanga chuan, "Wave na tak nen an hun lai chuan an thâwm a na ṭhin hle a. MNF pawh pheh thlûk tumin an su na thei hle. Amaherawhchu, MNF innghahna thuthlung hmuh ṭhelha MNF an dona kha an tihsual lai a ni ṭhin," a ti a; innghahna nghet nei lo chu an tlusawp thuai a, an ral leh mai ṭhin niin a sawi.

MNF din champha lawmnaah hian martarte sûn nan minute khat chhung ngawi rengin an ding a ni.