Mizorama sorkar mek leh CM-in BJP thawhpui an tum - Thanzara

Mizoram Pradesh Congress Committee chuan nimin khan Serchhipah 'Vote humhim la, ram chhanhim rawh' (Vote bachao, desh bachao) tih thupui hmangin vantlang inkhawm an buatsaih a; MPCC president Lal Thanzara chuan, Mizorama sorkar mek leh Chief Minister-in BJP thawhpui an tum mek niin a sawi.

Lal Thanzara chuan, ZPM kaihhruai sorkar chu an intiam angin hna an thawk lo nasa niin a sawi a, "Hetiang ang thutiam hlen lo sorkar hi Congress party kan ni ve dawn lo. Vawiina Mizorama sorkar mek leh Serchhip bialtu MLA, Chief Minister ni bawk hian BJP a sawimawiin, thawhpui a tum mek niin kan hria," a ti.

BJP chu Hindu rama India siam tumtu an nia sawiin Lal Thanzara chuan, "Kum 12 chhung rorelna an chang mek a, India ṭhalaiteah beidawnna nasa tak an thlen mek. India Parliament inthlanpui kan neih tur kum 2029-ah Pu Rahul Gandhi hi PM ni turin mi tam takin an ring ber tawh," a ti a; BJP do turin mipui a sáwm.

MPCC President chuan, BJP leh RSS ten Election Commission of Insia hmangin electoral roll aṭangin mi vaibelchhe 13 chuang an paih thu a sawi a, "He thil bawlhhlawh tak titawp tur hian Pu Rahul Gandhi hoin Congress party chuan nasa takin kan dodal mek a, BJP hmanrua CEC Gayanesh Kumar a bàn hma loh chu kan nawr zel dawn a ni," a ti.

All India Congress Committee aṭanga Mizoram viltu Dr A Chella Kumar pawhin thu sawiin, sorkar laipuia Narendra Modi leh Amit Shah te ṭang dunin democracy an sâwi nghîng mek thu leh, India mite dikna chanvo chhuhsak turin hma an lak mek thu a sawi.