KHAWTHLIR

MNYF-in thisen pe

Mizo National Youth Front chuan MNF din champha vawi 65-na pualin nimin khan Mizo Hnam Rûnah thisen pek rûnpui an huaihawt a, Civil Hospital, Aizawl tan thisen unit 38 an pe a, petute mipa 33 leh hmeichhia panga an ni. MNYF president Gogo Lalremtluanga chuan, ram leh hnam tana thisen chhuaka nun hlantute hnung zui a, mi dangte tana thisen pe zel turin kal khawmte a chah.

Heroin man

Excise & Narcotics department leh Assam Rifles thawk dun chuan nimin zing dar 6 khan Champhai district-a Ngur khuaa heroin kg 1.189 (hawng 100) an man. Heroin neitua puh Nanglamlian (30), Bulfek, Myanmar nia inchhál an man nghal a, Narcotic Drugs & Psychotropic Substances Act, 1985 Section 21(c) tlawhchhanin thubuai ziah luh a ni.

WCD hotute leh CADC CEM inkâwm

Women & Child Development director Zoramthangi Chhangte leh deputy director Flora Lalṭanpuii te chuan nimin khan Chakma Autonomous District Coucil chief executive member Nirupam Chakma chu a pisaah an kâwm. Chakma Customary Law Code, 1997 hnuaia hmeichhia leh naupangte dinhmun chhe lutuk chu ennawn tur leh, ram Danpui kalha Chakma hnam danin kumtlinglo inneih a phalsak chu a rang thei ang bera siamṭha turin an ngen.

Births and Deaths Registration sawiho

Mamit DC Suvigya S Chandra hoin October 21, Nilaini khan The Registration of Births and Deaths (Amendment) Act, 2026 chungchang thlirho a ni a; piang leh thi chhinchhiahna dan tharte chu mipuiin a zau thei ang bera an hriat theih nana hmalak an rêl. Pian hlima birth certificate siam lote'n DC pisaah buaipui tur a nih thu leh, kum hnih pêl tawhte'n District Court-ah dilna thehluh tawh tur a nih thu tarlan a ni.

PMGSY thlir lêt

PWD officer-te'n nimin khan PWD Engineer-in-Chief conference hall-ah Pradhan Mantri Gram Sadak Yojana hmalaknate an thlir let. PMGSY-IV hnuaiah hna thawh ṭan a nih dawn thu leh November 2026 aṭangin kawng 45 siamna atan tender chhuah a nih dawn thu tarlan a ni.