Home Minister-in LC House a hawng; 'Ruihhlo donaah tih tur kan nei ṭheuh' - HM

Home minister K Sapdanga chuan nimin khan a bial Aizawl North-III chhunga Electric Veng Local Council House sak thar a hawng a; ruihhlo donaah mi tinin tih tur an neih ṭheuh thu a sawi.

K Sapdanga chuan, veng fai tur chuan a rawttu, a rêltu leh a bawhzuitu awm a ngai tih sawiin, "Ruihhlo do kawngah pawh mahni zâwn ṭheuhah tih tur kan nei a, kan tih tur ṭheuh ṭha taka kan tihhlawhtlin hian ruihhlo kan nêkchêp thei. Khawtlang hmangaih taka NGO leh LC ten hna kan thawh hian sorkar tan kan thawk a, mipui tan leh keimahni tan hna kan thawk a ni," a ti.

Electric Veng LC House sak puitlin a nih theihna tura sum leh thâ thawhtute a chhuan thu sawiin K Sapdanga chuan, "Electric Veng hi veng ropui tak a ni a, vantlang inkhawmah pawh mi 1,000 dáwn la inko khawm thei veng kan la ni," a ti a; sorkar puihna kawngah ṭhahnem ngai zel turin a sáwm.

LC House hawn inkhawmah hian LC member te, YMA, MUP leh MHIP hruaitute an tel a; LC chairman Samuel Vanlalpeka'n kaihruaiin, LC vice chairman Vanlalduha'n in sak dan a sawifiah a, bialtu AMC corporator Dr Lallawmkimi Tochhawng pawhin thu a sawi.

Electric Veng LC sakna atan hian Building Social Welfare aṭanga sum hmuh hmangin bul ṭan a ni a, LC member ni tawhte leh bialtu corporator hlui Rosiamngheta'n pawisa an thawh a, bialtu MLA K Sapdanga'n MLA fund aṭangin sum ṭhahnem tak a pe bawk.