Nurse zirlai tharte lukhum khumtir

School of Nursing, Thingdawl chuan nimin khan Kolasib Diakkawn YMA Hall-ah 8th Capping & Lamp Lighting Ceremony leh 7th Graduation Ceremony an hmang a; Directorate of Nursing joint director Lalchhanhimi'n a hmanpui.

Inkhawmah hian Mizoram Nursing Council registrar Zochhuanpuii'n zirlai tharte nurse lukhum a khumtir a, khawnvar chhiin nurse thutiam a sawi rualtir. General Nursing & Midwifery (GNM) 8th batch first year zirlai tharte hi 20 niin, hmeichhia 17 leh mipa pathum an ni.

GNM zir zo mi 20-te zinga ti ṭha zualte leh class kai kimte hnenah Kolasib chief medical officer Dr RK Lalthlamuana'n lawmman a hlan.

School of Nursing, Thingdawlah hian December 2017 khan GNM zirna ṭan a ni a, principal pakhat, tutor paruk leh non-teaching staff 11 an awm. GNM course batch khatah zirlai 20 zelin lak an ni a, zirlai 60 an awm mek a ni.