KHAWTHLIR

Halpuah khap

Aizawl district magistrate Lalhriatpuia chuan thupek chhuahin, Diwali lo thleng turah hâlpuah leh hâlmawi chi hrang hrang Aizawl district chhungah lak luh, kawl, zawrh leh hâl khap a nih thu a puang. Thupek bawhchhiate chu dan hmanga hrem an nih tur thu a tarlang bawk.

Free medical camp

Indian Medical Association - Mizoram Branch, Mizoram Government Doctors Association, Indian Dental Association, ZMC Faculty Doctors Association leh Non-Government Association of Mizoram te chuan nimin khan Siah District Hospital tualah a thlawna inentirna an buatsaih a, Siaha bawrhsap Saizikpuii'n a hawng. Doctor 64 leh an thawhpuite'n inentirte hriselna dinhmun an en a, a thlawnin damdawi an pe. Damdawi hi Siaha bialtu MLA Dr K Beichhua in MLA fund aṭangin a tum a ni.

PM-NAM inzirtir

Lawngtlai bawrhsap Donny Lalruatsanga hoin nimin khan DC conference hall-ah Pradhan Mantri National Apprenticeship Mela (PM-NAM) awareness programme neih a ni. District Employment Exchange-a deputy director Reuben T Kompa-a'n PM-NAM kalphung leh ham­ṭhatnate a sawifiah a; zawhna leh chhanna hun hman a nih bakah, employer leh apprentice registration tih nghal a ni.

PTS-in thisen pe

Police Training School, Thenzawl chuan nimin khan an hmunah thisen pek rûnpui an huaihawt a, Serchhip District Hospital tan thisen an pe. Thisen pek tum police eng emaw zat awm mah se, blood bank-in a mamawh zat unit 35 lak a ni a; rilru hriselna (mental health) chungchang inzirtirna neih nghal a ni bawk.

CM Package sem

Commerce & Industries department chuan October 22, Ningani khan Mamit DC conference hall-ah mi 37 hnenah CM Special Package ṭanpuina an sem a, district bawrhsap Suvigya S Chanda-a'n a hmanpui. Ṭanpuina sum hman dan tur leh sum enkawl dante inzirtir nghal a ni.