Hma la ṭha YMA-te chawimawina hlan

YMA Rorel Inkhawm vawi ngana, October 22, Ningania LPS Arena-a neihah lawmman leh chawimawina chi hrang hrang sem a ni a; Tuipuiral Group leh Bethlehem Vengthlang Branch te chu YMA kumpuan bawhzui ṭha berte an ni.

Ramngaw leh nungcha humhalh ṭha berah Tuipuiral Group leh Ṭhiak Branch thlan an ni a, tuihna humhalh ṭha berah Tuipuiral Group leh Ailawng Branch thlan an ni. Lui dung humhalh ṭha berah Hnahthial Model Branch YMA thlan an ni bawk.

YMA branch chanchinbu ṭha berah Bethlehem Vengthlang Branch chanchinbu 'Builukham' thlan niin, lawmman Rs 5,000 hlan an ni a; Bungkawn Branch YMA chanchinbu Bungkawn Tlangau leh Sihphir Branch chanchinbu 'Sawiremtlang' tihte chu pahnihna niin, Rs 3,000 an dawng. Pathumna Vaivakawn Branch chanchinbu 'Vaivakawn Weekly' hnenah Rs 2,000 hlan a ni.

YMA Chanchinbu la tam ber Durtlang Branch-in copy 275 an la a, Aizawl bikah pahnihna Republic Veng Branch copy 244 leh pathumna Dinthar Branch copy 227 an ni a; Aizawl pawn lamah pakhatna Kawrthah Hmar Veng (copy 230), pahnihna New Champhai (copy 208) leh pathumna Maubuang (copy 111) an ni. Pakhatnate'n Rs 5,000, pahnihnate'n Rs 3,000 leh pathumnate'n Rs 2,000 an dawng.