Birla Fertility & IVF Centre-in Mizorama an hmalakna tarlang

Birla Fertility & IVF Centre, Guwahati hotute chuan nimin khan Hotel Floria-ah thuthar thehdarhtute an kâwm a; nau paia harsatna neite pui turin Mizoram Universal Healthcare Scheme (MUHCS) an zawm tawh thu leh IVF-a an hlawhtlinna (success rate) chu 70-75% a nih thu an sawi.

Birla Fertility & IVF fertility specialist Dr Kalpana Jain chuan, Mizoram leh India hmarchhak biala nau paia harsatna tâwk mi eng emaw zat an enkawl tawh thu a sawi a, "MUHCS empanel kan nih tawh avangin IVF hmanga nau pai tumte tan kawng a inhawng zau tawh a, thla ruk liam taa kan data aṭanga tehin IVF hmanga hlawhtling taka nau kan paitir (success rate) chu 70-75% a ni," a ti.

Dr Kalpana Jain chuan, Aizawlah out-patient department (OPD) service an nei ṭhin tih sawiin, "Tun hnaiah pawh khan damdawi-in dangte nen Synod Hospital-ah OPD kan rawn hawng a, OPD-a inentirte hi IVF hmanga nau pai thei an nih chuan Guwahati Centre-ah kan buaipui ṭhin," a ti. OPD an hawnna hmun tur leh hawn hun tur sawi lâwk thei lo mah se, a khát tâwka hawn ṭhin an tum thu a sawi bawk.