Lammual chhehvela hna thawhte enfiah: 'Mipui tana ṭangkai tur tam tak a awm dawn' - UDPA Minister

Urban Development and Poverty Alleviation (UDPA) minister K Sapdanga hoin sorkar hotute'n October 24, Inrinni khan Lammuala leh a chhehvel, Assam Rifles chhuahsan rama hnathawh mekte an enfiah. Minister chuan, Lammual chhehvelah mipui tana ṭangkai tur tam tak a awm dawn thu a sawi.

Lammual leh a chhehvelah hian Aizawl tlangdung kawngpui ber (main road) hnaihah kawng zauhna tur leh, Sarong Veng aṭanga tlangdung kawngpui hêlna (by-pass road) tur laih mek a ni a; tlangdung kawngpui aṭanga by-pass road panna tur kawng siam mek a nih bakah, in awm sa ṭhenkhatte cheiṭhat mek a ni.

Tlangdung kawngpui zauhna tur chu metre 68-a thui laih tur a ni a, metre 14-a zaua laih tur a nih rualin, kawngpui zauhna tur chu metre 10.40 a ni dawn a; hna thawh tur aṭanga 5% vel thawh a ni tawh. By-pass road chu metre 645-a thui, metre 12-a zaua laih tur niin, kawng zau zawng metre 7.80 a ni dawn a; hna 17% thawh a ni tawh.

Main road aṭanga by-pass road panna chu metre 19-a thui tur leh metre 5-a zau tur a ni a, hna 25% thawh a ni tawh. Public Square panna kawng tur laih mek a ni a, metre 9-a thui leh metre 7-a zau tur niin, hna 25% thawh a ni tawh. BCM biak-in panna tur kawng chu metre 3.50-a zau tur niin, hna 30% thawh tawh a ni.

Mandir zâwnah kawng metre 18-a thui chu metre 7-a zauh tur a ni a, mahse, mandir sawn a la nih loh avangin hna ṭan theih a la ni lo.

AR chhuahsan rama kawng siam tur zawng zawng hi km 1.785-a thui a ni a, hna thawhna atan cheng nuai 2,211 ruahman a ni. Shri Balaji Construction-in April 15, 2026 khan an thawk ṭan a, April 15, 2027-a zawh tura ruahman niin, hna zawh hunah kum 3 chhung an enkawl chhunzawm ang.

UDPA Minister chuan, ràl aṭanga thlir aiin a hmunah hna an thawh nasat dan a lan thu a sawi a, "Engkim ruahmanna a awm vek tawh a, khuain min bumro deuh avangin duh angin hna an thawk chak thei lo. Tih tak zetin kan nawr ang a, rang takin kan zo thei turah kan ngai," a ti.

Lammual leh a chhehvelah mipui tana ṭangkai tur tam tak a awm dawn thu sawiin K Sapdanga chuan, "Parking, transformer, power sub-station, amphitheatre leh thil dang eng emaw zat a awm dawn. Thing kih uihawm tak tak a awm a, kan environmentalist-te'n an ui em em a, thing uihawm tak takte chu kih a ni dawn lo," a ti a; mipui mamawh kawng erawh siam theih ngei an tum thu a sawi.

UDPA Minister hi minister of state B Lalchhanzova, Aizawl mayor H Lalremtluanga, PWD leh UDPA secretary V Lalsangliana, UDPA director Jacob Lalawmpuia bakah, PWD, PHE, Power & Electricity leh UDPA department hotute'n an ṭawiawm a ni.