KHAWTHLIR

Thisen pe

October 24, Inrinni khan pawl paliin thisen unit 162 an pe. KṬP, Nursery Veng Bialte'n ZMCH tan thisen unit 64 pein, petute mipa 45 leh hmeichhia 19 an ni. KṬP, Chawnpui Vengthlang Branch-in Synod Hospital tan unit 34 pein, petute mipa 27 leh hmeichhia pasarih an ni a; KṬP, Dawrpui Vengthar West Branch-in Civil Hospital, Aizawl tan unit 23 pein, petute mipa 18 leh hmeichhia panga an ni. Lunglei College Venga Edenthar Unit ṬKP member mipa 35 leh hmeichhia parukte'n Lunglei Civil Hospital tan unit 41 an pe bawk.

Minister hoin enfiah

Tourism minister Lalnghinglova Hmar leh Tourism department hotute chuan October 24, Inrinni khan Tourism department-in a tibchangtlun tur Aizawl View (Falkland Veng) leh Hangi Lunglen Tlang leh Chite Venga tourism project kal mekte an enfiah. Consultant leh khawtlang hruaitute nen hmalak dan tur an sawiho a ni.

Awareness buatsaih

Mizoram State Council for Child Welfare (MSCCW) chuan October 23, 2026 khan PC Girl's School-ah 'Ka hlutna leh himna' tih thupui hmangin awareness programme an buatsaih. Inzirtirna hi naupangte'n an dikna, hlutna leh himna pawimawhzia an hriat theihna atana buatsaih a ni a, resource person Dr Lalhriatpuii, training specialist, Women & Child Development leh, MSCCW member Vanlalpeki ten thil pawimawhte an zirtir a ni. Thupui hmangin zirlaite'n thutiam an sawi rual bawk.

Inchhawp hnai

Lunglei District Bawrhsap bul tuma mipuite'n an khuaa sorkar department-te an chhawr ṭangkai theihna tura hmalakna, 'I Kawtkaiah Sawrkar' (Prashasan Gaon Ki Ore) tih chu tun hnai khan khan Lungsen RD Block chhunga Rualalung khuaah buatsaih a ni. DC pisa bakah, BDO, AH&Vety, Agriculture, Horticulture, Health & Family Welfare leh Power & Electricity department ten stall hawngin, awlsam zawka mipuiin an dawr theih turin an chhawp hnai. Rualalung leh a chhehvel khaw mipuite'n lehkha pawimawh hrang hrang an siamtir a, a thlawna inentirna buatsaih nghal a ni.