Serchhip dist-ah HIV vei 943 awm mek

Serchhip District AIDS Prevention and Control Committee chuan October 23, 2026 khan HIV/AIDS chungchanga Serchhip district dinhmun leh hmalaknate an thlir; Serchhip district-ah HIV vei mi 943 an awm mek thu tarlan a ni.

Bawrhsap Paul L Khuma kaihhruai ṭhutkhawmah hian North Vanlaiphai, Khawlailung, East Lungdar leh Chhiahtlang khuaahte in tina kala HIV leh syphilis vei an awm leh awm loh endikna an rêl. Lirthei (truck, taxi, auto-rickshaw leh maxicab) khalhtute tanaa HIV & STI screening neih leh, high risk group ho hnena zan lama chhuaka HIV leh syphilis test service pek chhunzawm an rel bawk.

Ṭhutkhawma tarlan danin, Serchhip district-ah HIV vei an awm mek a; September 7 - October 20, 2026 chhunga Intensified IEC Campaign 3.0 kalpuinaah khaw 25-ah mi 225-te thisen endik a ni a, HIV vei hmuh chhuah an awm lo a, syphilis vei pakhat hmuh a ni thung.

October 2026 report-ah Serchhip district dinhmun chu surakshit status (goal) 83.5-97-96 a ni a; 1st 95 tih loh chu tihhlawhtlin vek tawh niin, Serchhip district chu Saksham level-ah a awm mek. National AIDS Control Organisation (NACO)-in Mobilization for AIDS Suraksha (MAS) Campaign a kalpui mekah district/state tinte chu Surakshit Status (goal) 95-95-95 nei tura tih an ni.

Surakshit Status (goal) 95-95-95 tiha 95 hmasa ber chu NACO-in HIV vei awm zat tura a chhût aṭanga 95% aia tlem loin HIV an vei leh vei loh an hre tur a ni, tihna a ni a, 95 pahnihna chu HIV vei zinga 95% talin ART damdawi an ei tur a ni tihna niin, 95 pathumna chu ART damdawi ei zinga 95% aia tlem lo chu damdawiin natna hrik (virus) che thei loin a siam tur a ni tihna a ni. 95-95-95 target hi December 1, 2026 hmaa tihlawhtling vek turin NACO chuan a ti.