Chanmari MUP-in kum 50 tlin an lawm

Mizoram Upa Pawl (MUP), Chanmari Branch chuan October 24, Inrinni khan Chanmari YMA Hall-ah golden jubilee an lawm a, bialtu MLA K Sapdanga, minister, bialtu corporator Dr Lallawmkimi Tochhawng leh MUP Gen Hqrs president Nghaklianmawia ten an hmanpui.

K Sapdanga chuan, kum 51 kal ta khan Chanmari vengah a khawsak ve tawh thu leh, chu'ng laia amah kaihruaitu mi eng emaw zatin mual an liam tawh thu a sawi a, "Veng dang kan awt ngai lo a, kawng hrang hrangah inlungrual takin kan awm ṭhin. Vawiina veng tan leh kan mihringpuite tana ṭangkai taka kan awm theih chhan chu hruaitu kal hmasate'n nasa taka sûl an lo sut tawhna zar kan zo a ni," a ti.

UDPA enkawltu K Sapdanga chuan, tunlaiah in ropui tam zawng, dawrkai tam zawng, venga officer tam zawng te chu hmasawnna tehfung pawimawh a ni tawh mang lo tih sawiin, "Hmasawnna leh zahawmna tehfunga hman tlanglawnte chu an veng a fai em, khawtlang an lungrual em, veng chhung a ralmuang em, kohhran an hlim em tihte a ni tawh," a ti a; tuna hmasawnna leh changkanna bulpui chu MUP member ni mekte an nih thu a sawi.

MUP, Chanmari Branch golden jubilee lawmna inkhawm hi an president R Sangliana'n a kaihruai a; Vanneihtluanga'n jubilee souvenir sawi zauin, K Sapdanga'n a tlangzarh a, tlaiah jubilee ruai an ṭheh.

Chanmari-ah hian October 24, 1976 khan MUP Branch din a ni a, a tirah member 51 an awm. Kuminah member 545 awmin, mipa 199 leh hmeichhia 346 an ni a, an zavaiin MUP life member an ni. An jubilee pual hian a thlawna inentirna leh infiamna an buatsaih a, an member eng emaw zat hnenah thilpek an hlan bawk.