Motor-in a sut leh chîl vangin thi

H Ramliana (42) s/o H Vanlalhruaii, Mission Vengthlang chu nimin chawhma dar 9:30 vel khan hna a thawhna hmun Vairengteah lirtheiin a sut leh chîl vangin a thi.

Vanglaini thu dawn danin, H Ramliana hi Vairengteah UCO Bank manager a ni a; nimin zing khan Aizawl aṭangin bike-in Vairengte a pan. Vairengte tawntirhah amah tâwk zawnga tlân Maruti Suzuki Ecco van-in truck a tlân pelh laiin H Ramliana chu a su tlu a, bike aṭanga per chhuakin, truck-in a chîl zui a, ká chhawn lohin a thi.

Ecco van hi Bagha aṭanga bungrua sema rawn kal nia hriat a ni a, a khalhtu a tlanbo nghal a, a motor chu Vairengte Police-in an la. Truck khalhtu (hnam dang) chu police kutah a inpe nghal.

H Ramliana ruang hi Vairengte damdawi-inah enfiah (postmortem) a ni a, nimin tlai dar 4:30 vel khan Vairengte aṭangin Aizawl panpui a ni a, vawiin chhun dar 12-ah vui a ni ang.