Supply Minister-in gas pipe phûm a tlawh

Food, Civil Supplies & Consumer Affairs (FCSCA) minister B Lalchhanzova chuan nimin khan Northeast Gas Grid Project (NGGP) kaltlanga Indradhanush Gas Grid Limited (IGGL)-in Panisagar, Tripura aṭanga Aizawla gas pipeline km 119.450-a thui phûm mekna Tuidam, Mamit district-ah a tlawh a; Sihhmui thlenga pipe phûm tur chu March/April 2028 hmain zawh beisei a nih thu a sawi.

FCSCA Minister chuan, ram hrang hranga buaina thlengin a nghawng zingah eirawngbawlna gas (LPG) a tel thu a sawi a, "Buaina avangin hun eng emaw chen Mizoramin harsatna a neih phah. In chhunga eirawngbawlna chu gas pipe connection-a thlun zawm a nih theih nan NGGP hnuaiah India hmarchhak state hrang hrangin gas pipeline connection an neih theih nan cheng vbc 9,265 vel sêngin gas pipeline km 1,656-a thui phûm hna thawh mek a ni," a ti.

Mizoram chu Tripura Natural Gas Company Limited nen thlun zawm turin IGGL-in hma an la mek tih sawiin Minister chuan, "Ruahmanna hi Mamit leh Aizawl district-a kalpui hmasak tur niin, March/April 2027 chhungin Mamit a luh hman beisei a ni a, Aizawl (Sihhmui) pawh March/April 2028 hmaa thlun zawm hman beisei a ni. Gas pipeline hmanga thlun zawm kan nih chuan CNG (compress natural gas) hmangin lirtheite tlantir theih a ni ang," a ti a; tuialhthei mamawhna nasa taka a tihhniam beisei a nih thu a sawi.

B Lalchhanzova chuan, "LPG mamawh ang tâwk hmuh loh vanga eirawngbawlna kawnga harsatna awm ṭhin chu gas pipeline connection hian a sutkian kan beisei," a ti a; a rang thei ang bera Mizoram mipuiin gas pipeline connection an hman theih nan IGGL hotute chu ṭan la tura chahin, project tihpuitlinna atan a ṭul apiangah Mizoram sorkar chu pui turin a inpeih reng thu a sawi bawk.

Supply Minister hi FCSCA secretary Ravi Dadich leh director R Lalṭhazuala, Mamit bawrhsap Suvigya S Chandra bakah, sorkar hotu dang te, IGGL leh MECON hotute'n an ṭawiawm a ni.

TRIPURA-MIZORAM GAS PIPELINE

☑ NGGP kaltlanga IGGL hmalakna hnuaiah Tripura Natural Gas Company Limited leh Aizawl khawpui chu gas pipeline-a thun zawm tur a ni.

☑ Pasinagar-Aizawl inkar km 119.450-a thui a ni a, gas pipeline inchi 12-a lian, mm 7.14-a chhah phum a ni.

☑ Sectionalizing valve station paruk, dispatch terminal pakhat leh receiving terminal pakhat a awm dawn.

☑ Pipeline hian Tripura state-a khaw paruk paltlangin, Tripura-ah km 15.105-a thui a ni dawn.

☑ Mizoramah khaw 20 a paltlang dawn a, km 104.345-a thui a ni ang.

☑ Pipeline thlun zawm hna hi IGGL hnuaiah Cortech International Limited-in an thawk.

☑ Project atan NGGP hnuaiah cheng vbc 491 ruahman a ni.