Assam Rifles damdawi-in awmna ṭhin tlangah Aizawl Square siam a ni dawn

Urban Development & Poverty Alleviation (UDPA) minister K Sapdanga chuan nimin khan ZPM pisaa inkhawmah thu sawiin, Aizawl khawpui lailia Assam Rifles awmna ṭhina AR damdawi-in awmna ṭhin tlang (Hotel Ritz zâwn vel)-ah Aizawl Square siam a nih dawn thu a sawi.

K Sapdanga hian AR-te'n an chhuahsan tâk Lammual leh a chhehvel chei dan tur a sawifiah a, "Sipai damdawi-in tlang saw zuah a ni ang a, chumi tlang hêl kualin kawngpui lian tak a awm ang a, thingte saw zuah a ni ang a, a hming atan ‘Aizawl Square’ tih a ni ang," a ti.

Treasury Square leh Bazar Bungkawn inkar kawngpui chu a zím lai ber pawh metre 14-a laih tlang tura tih a nih thu sawiin Sapdanga chuan, "Chhuah lama motor kalna tur Dak Inpui aṭanga liamin, Saron Venga Baptist Kohhran biak-in bula chhuak tur kawngpui a tlang dawn," a ti a; a theih chen chenah thing kit lo thei ang bera hmalak tum a nih thu leh, thing hlu tak takte zuah a ni dawn thu a sawi.

UDPA Minister chuan, Dak Inpui aṭanga Saron Veng inkar, Lammual thlang lama kawngpui thar siam turah tuna Saron Venga Baptist biak-in ṭhiah a ngai dawn tih sawiin, "Sorkar hotute inráwn tlangin, Baptist biak-in thar sakna tur inremsiamin, a sakna tur sum pawh inbiak rem vek tawh a ni. Bungkawna mimal dawr ṭhiah ngai pawh Dawrpui pa ho leh dawr neitute an inhnûk hniam a, an entawn tlak hle. Hmun dangah mawi takin in inang tlang an luah tur sa tura inruahman a ni," a ti.