Huapzo sorkar din kan tum - Dy. CM Tawnluia

Vanglaini palaiin nimina a pisaa a kawmnaah Tawnluia chuan, MNF kaihhruai sorkar chu mipuite sorkar leh huapzo leh thlei bik nei lo a nih tur thu sawiin, "Chutiang tur chuan bul ṭan kan tum. Rualkhai taka hmasawnna kan neih theihna atan mipuite ṭawiawmna kan ngen a ni," a ti a, kut hnathawktute sorkar an siam dawn thu a sawi.

Tawnluia chuan, Pathian hnena an dil leh ṭawngṭaina angin tluang takin buaina leh harsatna lian tham awm loin kum 2019 an chuangkai tih sawiin, "Pathian hnenah lawmthu kan sawi tak meuh a ni. Kum a thar angin, rilru thar nen ram leh hnam hmasawnna atan kan ngaihtuah hmang ang u," a ti a; ram tana hna thawhnaah mipuite chu thawhpuiah a sáwm.

Zoram mipuite hmasawn atan ngaihtuahna hrang hrang nei ṭhin mah se, a pawimawh ber chu Pathian a nih thu sawiin Tawnluia chuan, "Zoram mipuite'n kan ram hmasawnna atan Lalpa ṭih leh ráwn chungin kum tharah chuan tih tak zetin hma i la tlang ang u tiin kan insáwm a ni," a ti.

Deputy CM chuan, kan ram hi kan chenna atana Lalpa min pek, kan ram neih chhun a ni tih sawiin, "Keini'n kan tihhmasawn loh chuan tumahin min tihhmasawnsak dawn lo. Mizo mipui ngei hian kan hnam inpumkhatna hmanga kan hnam hi kan chawisan a ngai a ni," a ti a; Mizo nationalism chawi kâng turin mipuite a thara an inbuatsaih a ṭul thu a sawi.

Tawnluia chuan, kum tharah sorkar hnathawkte chu pisa kai hun vawng dik turin a chah a, "Mipui rawng kan bàwl hun chhung atana sorkarin hun a bitukah chuan zelthel loin, thawh tur a awm emaw, awm lo emaw, sorkar leh mipui zah vang ringawt pawhin kan zelthel a thiang lo a ni," a ti.