HM-in mipuite chungah lawmthu a sawi

Home minister Lalchamliana chuan Krismas leh Kum thar hunpui tluang tak leh ralmuang taka hman zawh a nih avangin mipuite chungah lawmthu a sawi a, Mizoram mipuite Kumthar chibai a buk nghal.

Home minister chuan, "Hunpui a lo thlen hian mi tin maiin nuam leh hlim taka hman kan duh a, chutihlai chuan vanduaina, chhiatna leh pawikhawihnate a thleng fo ṭhin. Tun hunpui kan hman zawh takah khan boruak ralmuang tak hnuaiah hun hlimawm tak kan hmang thei niin a lang a, a lawmawm hle a ni," a ti a; police leh anmahni ṭawiawmtu tlawmngai pawlte, mahni veng leh khuaa hlawh pawh nei loa venhim hna thawktute chungah lawmthu a sawi. 

Lalchamliana chuan mipuite chu dan leh thupek kenkawh kawnga thawktute ṭawiawm zel turin a ngen a, Mizoram chu remna leh muanna hnuaiah ralmuang  tak leh him taka a awm zel theihna turin mipui nena thawhhona ṭha neih a pawimawh thu a sawi a, mipuite thawhpuiah a sawm. 

Home Minister chuan Mizorama tlawmngai pawl hrang hrangte leh kohhrante chu ram siamna kawnga thawhpuiah a sawm a, "Mizoramah chuan kohhran leh tlawmngai pawl ṭha tak kan nei a, state dangte neih ve loh thlamuanpui tham kan nei a ni. Anni tel lo hian ram a kal thei lo a, sorkar pawh a kal dik thei dawn lo a, chuvangin Home minister ka nih angin an mi finchhuahna, ṭawiawmna leh thawhpuina ka ngen a ni," a ti.

Lalchamliana chuan Mizoram mipuite chu Kumthar chibai a buk pahin sorkar kal zel turah ṭawiawm a, a ṭul huna finchhuah a, sawisel a ngaihna laia sawisel ngam a, thlawp a mamawh huna thlawp tlat turin a sawm a ni.