Hunpui vuakvêtah beihpui thlak dawn: Kuhva rah tawlhrûk 99%-in a rêm - HM

Mizoram Police chuan Krismas leh kumthar lo thleng tur vuakvêtah mipuiin tlamuang taka hunpui an hman theih nan Aizawlah beihpui an thlak dawn. Home minister K Sapdanga chuan, kuhva rah tawlhrûk chu a vanglai aṭanga chhûtin 99%-in a rêm tawha an ngaih thu a sawi.

Police-te'n beihpui an thlak tur thu hi Home minister K Sapdanga'n October 26, Thawhṭanni khan a pisaah a sawi a, "Krismas leh kumthar vuakvetah mipuiin thlamuang taka hun an hman theih nan te, veng kilkhawr ber pawhin auh mai phakah police an duty tih an hriat theih nan leh dan bawhchhia eng chi pawh thunun thei turin police-te'n beihpui kan thlak dawn," a ti.

Home Minister chuan, khawpui chhunga police station, out post leh beat post hlat deuhte dap chhuah vek a nih dawn tih sawiin, "Chungah chuan duty post siam tur a ni. A ṭhenah chuan a rem phawt chuan YMA, VDP emaw JAC office kan ṭâwm ve mai ang. Police duty-te'n an huam chhung ramri chiang takin an siam ang," a ti a, duty post tinah police pali vel an awm tur thu a sawi.

Police duty-te chuan an riah chilh chiah loh pawhin, englai pawha biak pawh theih tura an awm tur thu sawiin K Sapdanga chuan, "Zanlai pelh dar 2 vel thleng tal awm tura beisei an ni. Mahni bial chhung an fang kual ṭhin dawn a, thâwmte pawh an siam ang. Engtiklai pawha puitu tur an awm reng a ni tih mipuite'n an hriat theihna atan hman an la dawna ni," a ti.

Home Minister chuan, district khawpui tinah an ti thei dawn em tih an rêl vel mek thu sawiin, "District tin SP-te mawh phur turin kan ti a, kan hriattir tawh. Duty-te'n anmahni puitute nen thingpui an inna tur kan ngaihtuahsak ang," a ti a; mipuite'n zalen taka hun an hman theihna atan theihtawp chhuaha ṭan lak an tum thu a sawi.

K Sapdanga chuan, kuhva tawlhruk thâwm a awm leh ṭhin thu sawi a sawi rualin, "An tawlhruk vanglai ngaihtuah chuan 99%-in a rêm tawhin kan hria. Car, pick-up leh sumo ten an chhêk khawl. Truck-a an man hian checkgate an paltlang tihna a ni kher lo, an chhêk khâwl sa truck-in an phur leh ṭhin. Kuhva rah tawlhruk tirêm turin theihtawp kan chhuah zel ang," a ti.

Home Minister chuan, dan phal loh thil tawlhruk donaah YMA, YLA leh MTP te hmalakna a fak a, "Anni hian hlawh nei loin theihtawp an chhuah. Hlawh an nei lo a, an sum sengin theihtawpin sorkar an pui ṭhin a ni," a ti a; tlawmngai páwlte inpekna fakawm an tih tak zet thu a sawi.

Minister ṭawiawmtu IGP H Ramthlengliana sawi danin, ramri hrûla khaw ṭhenkhat, police awm lohna hmunah ruihhlo dona atan police dah leh a ni dawn. A hmaa an dahna khuaah chuan dah a ṭul tawh rih loa hriat a nih avangin an dah tawh dawn lo a, ruihhlo tawlhrukna kawnga an hman khuaahte dah a ni ang.