Serchhip MJA member-te'n AI zirho

Mizoram Journalists' Association (MJA), Serchhip district chuan nimin khan an member-te tan artificial intelligence (AI) chungchang zirhona an buatsaih a, Serchhip district bawrhsap Paul L Khuma'n a hmanpui.

Zirhonaah hian The Frontier Despatch editor Adam Saprinsanga'n chanchin thar buatsaihna atan AI leh online-a hmanraw dangte hman ṭangkai dan te, AI rin dan chintâwk neih thiam a ṭulna te, technology mila hnathawh theih dante a zirtir a; zawhna leh chhanna hun hman a ni.

Serchhip Bawrhsap chuan, Serchhip District MJA-in AI chungchang zir nachang an hria chu changkang a tih thu a sawi a, "Khawvel changkanna mil zela finna pawh kan lak luh ve zel a ngai a, intuaithar zel kan mamawh," tiin, thil dangah pawh hmasawnna ṭha ûm zel turin a fuih.

Serchhipa IPR officer R Vanneihtluanga pawhin thu sawiin, huaisenna leh dikna nen hna thawk a, thu dik leh rintlak thehdarh kawngah ṭan la zui zel turin Serchhip MJA member-te a chah a ni.