MZP-in an din champha an lawm

Mizo Zirlai Pawl chuan nimin khan Berawtlang Multipurpose Hall-ah MZP Rising Day an lawm a, Education minister Dr Vanlalthlana'n a hmanpui.

Education Minister chuan, MZP chu sorkar khalh ngiltu a nih ṭhin thu sawiin, "Remna kan neih theih nan te, Zo fate inpumkhat nan te, ramri humhalh nan te, chîmrala kan awm loh nan te, Mizote'n technical seat kan hum theih nante an thawh hlâwk hle," a ti a, theihtawp chhuah zel turin a chah.

Zirlaite hi Mizoram hmabak an nih thu sawiin Dr Vanlalthlana chuan, "Tuna awm mekte hi nakin lawkah kan ral zel dawn a, he ram hi kan inhlân chhâwng zel a ni. Kan mi hmasate'n an hun laiin an lo humhim tawh a, kan hun ṭheuhah kan humhim a, ṭhangtharte chenna tlaka kan siam zel a ngai," a ti.

MZP president C Lalremruata pawhin thu sawiin, "Sorkar hi a theih chin chinah MZP-in a thawhpui dawn a, a thláwp dawn. An dik lohna leh fel lohnaah erawh chuan kan dodal zel dawn," a ti a; zirlai pawl inthlanah political party-te inrawlh lo se a duh thu a sawi.

MZP hi kum 1935 khan din a ni a, nikum aṭang khan kum 90 tlin an lawm a, nimin khan kum 90 tlin lawmna khàr nghal a ni.