Zu zawrh tihtawp ngei kan tum - END Minister

Excise & Narcotics department (END) minis­ter Dr K Beichhua chuan, Mizoram sorkar, MNF party kaihhruaiin zu zawrh tihtawp ngei a tum thu a sawi a, "Zu zawrh titawp turin hmalak a ni ang," a ti.

Thuthar thehdarh­tute'n nimina a pisaa an kawmnaah Dr K Bei­chhua chuan zu zawrh tihtawp ngei sorkarin a tum thu a sawi a, "Mipui ṭawiawmna kan mamawh tak zet dawn. Mipui ṭawiawmna tel lo chuan zu zawrh tihtawp kan tum hi a hlawhtling dawn lo. Zoram chhe tawh tak siam ṭha leh turin mipui ṭawiawmna kan ngen a ni," a ti a, mipuite theihtawpa ram siamṭhat kawnga thawhpuiah a sáwm.

Dr K Beichhua chuan, December 18, 2018-a Cabinet Meeting chuan sorkarin zu a zawrhte a titawp a, December 21 aṭanga January 14, 2019 thleng dry day a puan thu sawiin, "December 19 khan Chief Minister hoin a pisaah sorkar leh NGO hrang hrangte'n zu khuahkhirh chungchangah joint meeting neih a ni a, sor­karin zu a khapna dan tur leh thil ṭul dangte ngaihtuaha lo zir hmasa turin Liquor Prohibition Coordination Committee din ni se, tih a nih ang din a ni," a ti. 

END Minister sawi danin, Liquor Prohibition Coordination Committee ruahman angin Krismas leh kum thar vuakvet laiin Mizoram hmun hrang hrangah zu leh ruihhlo laka mipuite himna tur ngaihtuain check post pakua siam a ni. Mobile team siam a ni bawk a, team-te chuan Bawngkawn-Selesih-Ṭhuampui kawng te, Aizawl By-pass Road - Falkland-Zampuimanga Point te, Hlimen-Ngaizel te, Lawipu-Tlawng (Reiek kai) te, Bawngkawn-Hunthar-Lungverh péngah patrolling an nei ṭhin.

Vairengte, Saiphai, Phaisen, Bairabi, Kanhmun, Zokhawthar, NE Khawdungsei, Khawlian/Daido, Tuipuibari leh New Vervek/Luakchhuah luiahte out post awm saah police leh YMA-te an duty ho a, END-in a remchanna hmunah an ṭawiawm bawk.

Dr Beichhua chuan, zu leh ruihhlo dangte tihrêm an tumnaah mipui ṭawiawmna an dawn ṭhat thu a sawi a, "Department hrang hrangte an thawhhona a ṭha. Krismas leh kum thar boruak muanawm a, thil ṭha lo lian tham thleng hriat tur a awm lote hi Pathian vang a ni a, mipuite chungah lawmthu kan sawi tak meuh a ni," a ti.