KHAWTHLIR
Hnathawh thlirho
Lok Sabha MP Richard Vanlalhmangaiha hoin nimin khan Mamit District Development Coordination & Monitoring Committee chuan sorkar laipui scheme hrang hranga hnathawhte an thlirho. MP chuan, Mamit district-a ambulance indaih lohna chungchangah kum 2026-27 chhunga hmalakna a awm loh chuan MP fund aṭanga ngaihtuahsak a inhuam thu a sawi.
Ruihhlo do sawiho
Mamit District Level Committee on Narco Coordination Centre chu chairman Suvigya S Chandra, district bawrhsap kaihhruaiin nimin khan an ṭhukhawm. Ṭha lehzuala ruihhlo tawlhrûk ven dan tur te, dan kengkawhtute nen ṭha lehzuala thawhho dan tur te, ruihhlo hman sual donaa hmasawnna turte sawiho a ni.
Tuia tlak hlum ven dan sawiho
State Drowning Prevention Core Committee chu nimin khan an ṭhu a, Health & Family Welfare additional secretary Lalnunmawii'n a kaihruai. Mizorama tuitla vanga thihna thleng ṭhin vêng tura sorkar hmalak dan tur sawiho a ni a; District Drowning Prevention Committee din an rêl.
Capping & Lamp Lighting hmang
Blessino Nursing School chuan nimin khan BSI Hall-ah Capping & Lamp Lighting vawi 8-na leh Graduation vawi 5-na an hmang a, Higher & Technical Education minister Dr Vanlalthlana'n a hmanpui. ZMCH nursing superintendent K Laltlanpuii kaihhruaiin nurse zirlaite'n bati chhiin, nurse thutiam an sawi a; zirlai ti ṭha zualte chawimawina hun hman a ni.
Loneitute zirtir
Krishi Vigyan Kendra, Khawzawl chuan nimin khan Ngaizawlah loneitute tan sorkar laipuiin buh leh bâl chînna hmun ram leilungte uluk leh him zawka enkawl theihna tura hma a lakna, Khet Bachao Abhiyan (KBA) chungchang inzirtirna an buatsaih. KVK head & senior scientist Dr Malsawmkimi'n a kaihruai a, subject matter specialist Vanlalnunhlui'n KBA chungchang a sawifiah.