Chhiatna a thlena chhan chhuaktute inbiakna a chah lohna tur tlangzarh

Minister PC Vanlalruata chuan nimin khan Aijal Club-ah chhiatna a thlena chhan chhuah hna thawktute inbiakpawhna a chah lohna tura duan Public Safety and Disaster Response Communication System (PSDRCS) a tlangzarh.

PSDRCS hi chhiatna a thlena chhan chhuah hna thawktute (SDRF, Police, Fire Services) inbiakpawhna a chhiat lohna tura duan a ni a; inbiakpawhna hmanrua ṭang kawp (overlapping communication) niin, a pui ber atan Aizawlah DMR Tier-III Trunking network hman a ni.

Kolasib, Champhai leh Lunglei district-ah te DMR Tier-II Conventional Network hman a ni a; chumi puitu (secondary) atan Mizoram pum huapa hman theih turin 4G/5G broadband kaltlangin Mission Critical Communication System (MCCS) a awm.

Network pahnihte hi State Emergency Operation Center, Aizawl nen thlun zawm a ni a, dispatcher-te'n DMR leh MCCS hmangtute chu hmun khatah biain thu an pe chhuak thei dawn a ni. Call zawng zawng record a nih bakah, GPS kaltlangin a hmangtute awmna hmun hriat theih a ni bawk.

Harsatna thlen laia network leh hmanruate a thih loh nan Fuel-cell Hybrid Power leh solar hmangin darkar 100 chhung nung turin power backup dah a ni.

PC Vanlalruata chuan PSDRCS chu project lian leh sum sen tamna a nih thu a sawi a, "Mizoram hi chhiatrupna thlen theihna sang taka awm kan nih avangin he project hi kan ṭangkaipui hle dawn a ni," a ti a; chhiatna a thlena sorkar leh tlawmngai pawlte an thawkho ṭhin chu ropui a tih thu a sawi.

PSDRCS hawnnaah hian DMR secretary Sushil Singh leh Aizawl bawrhsap Lalhriatpuia te pawhin thu an sawi a ni.