RIPANS-a Nursing zirlaite'n thu an tiam

RIPANS College of Nursing chuan nimin khan an auditorium-ah Lamp Lighting & Oath Taking vawi 26-na an hmang a, bialtu MLA Lalthansanga, minister-in a hmanpui.

Inkhawmah hian Apollo School of Nursing principal Lalhmingmawii kaihhruaiin BSc Nursing zirlai 55-te'n bati chhiin nurse thutiam 'Florence Nightingale Pledge' an sawi. Zirlai 55-te chu Mizoram bakah, hmarchhak state dang pariat leh Prime Minister Special Quota hnuaia Jammu & Kashmir aṭanga kalte an ni.

Khuallian Lalthansanga'n Best Preceptor atana thlan zirlai pali hnenah chawimawina a hlan a; Best Preceptor atana thlan zirlai hi BSc Nursing zirlaite'n clinical duty an tihna damdawi-in pali - Aizawl Civil Hospital, Kulikawn Hospital, Mizoram State Cancer Institute leh Zoram Medical College & Hospital aṭangin zirlai pakhat ṭheuh an ni.

Minister Lalthansanga'n fuihna thu a sawi bakah, RIPANS director Dr Sanjay D Sawant-a'n thu a sawi a; RIPANS College of Nursing principal Prof. Lalfamkim'n college dinhmun tlangpui a sawi bawk.

RIPANS College of Nursing hi kum 1996 khan din niin, Mizorama nursing college hmasa ber a ni a, BSc Nursing batch 27 awm tawhin, mi 879-in an zir chhuak tawh a, MSc Nursing batch thum aṭangin mi 65-in an zir chhuak tawh. Academic session thar aṭangin Nursing-ah PhD zirna hawn tum a ni bawk a ni.