Electoral roll ennawnna kalpui mek a ni

Election Commission of India (ECI) thuchhuak angin, Mizoram pumah electoral roll ennawnna, Photo Electoral Rolls Special Summary Revision 2019 neih tur a ni a, chumi atana Draft Electoral Roll chu December 28, 2018 khan district tinah tàr chhhuah a ni. Tun ṭuma electoral roll ennawn hi Lok Sabha inthlana hman tura ngaih a ni.

Electoral roll ennawnnaah hian, draft roll tàr chhuah ní aṭanga January 25, 2019 thleng electoral roll aṭanga paih, thun thar, siamṭhat ngai leh insawn duhte tan dilna (claim and objection) hun hawn a ni dawn a; mahni bialtu booth level officer (BLO) hnenah thehluh theih a ni a, website www.nvsp.in aṭangin online-in dilna a thehluh theih a ni bawk.

Dilna lutte chu January 26 aṭanga February 11 chhungin ERO/AERO-te'n an endik ang a, endiknaah hian khua/veng tina village council/local council bakah, NGO hruaitute leh BLO-te tel tura beisei an ni. ERO/AERO-te chinfel tawh chu DC Office-a Election Branch-in a thliar hrang leh ang a, February 18 thlengin database siamṭhat (update) a ni dawn a; electoral roll thar ber chu February 22, 2019-ah tihchhuah a ni ang.

Assembly constituency 14 awmna Aizawl district-ah chuan district election officer (DEO) hoin DC pisaah Draft Photo Electoral Roll tàr chhuah a ni a, district dangahte pawh DEO hoin political party tin aiawhte nen tàr chhuah a ni. Draft roll-a a lan danin, Aizawl district-a constituency 14-ah polling station 328 a awm a; voter 2,89,456 awmin, mipa 1,37,219 leh hmeichhia 1,52,237 an ni a, voter-te'n EPIC an nei vek tawh. Kum 2018-ah khan Aizawl district-ah voter 2,88,338 an awm a; nikum aia draft roll-a voter tamna chu 1,118 a ni a, 0.39%-in an pung tihna a ni. 

Assembly constituency pasarih awmna Lunglei district-a draft electoral roll chu Lunglei Election officer James Lalnithanga'n DC Conference Hall-ah a tlangzarh a; tlangzarhnaah hian Lungleia political party hrang hrang aiawh te, MJA hruaitute leh tlawmngai pawl aiawhte an tel. Lunglei district draft electoral roll-a a lan danin, Lunglei district-ah hian voter 1,05,594 an awm a, mipa 52,234 leh hmeichhia 52,841 an ni.

Siaha district-a Assembly constituency pahnihah chuan draft roll-ah hian mi 38,890 an awm a, service voter 142 an awm. Lawngtlai district-ah chuan constituency pathum a awm a; chu'ngah chuan vote nei mipa 39,991 leh hmeichhia 40,234, an vaiin mi 80,225 an awm.

Champhaiah pawh DC Conference Hall-ah additional DEO Liansangzuala Chhak-chhuak-in Draft Electoral Roll a tlangzarh a, tlangzarhnaah hian political party aiawhte leh NGO aiawhte telin, draft roll copy pek an ni. Draft roll-a a lan danin, Assembly constituency panga awmna Champhai district-ah hian polling station 137 a awm a; voter 84,705 awmin, mipa 41,910 leh hmeichhia 42,795 an ni a, mipa aiin hmeichhia 885-in an tam zawk.

Mamitah chuan DC Conference Hall-ah additional DC Jacob Lalawmpuia'n draft roll a tlangzarh. Draft roll-a a lan danin, Mamit district chhungah polling station 116 a awm a; voter 65,484 awmin, mipa 33,286 leh hmeichhia 32,198 an ni a, kum 2018 electoral roll aiin 0.64%-in an pung a ni.