Health Minister-in damdawi-in a tlawh

Health minister Dr R Lalthangliana chuan December 27, 2018 khan Cancer Hospital, Zemabawk leh State Referral Hospital, Falkawn a tlawh a, damdawi-in dinhmun a enfiah.

Dr R Lalthangliana chuan, MNF-in sorkarna an chan hmasak laka Referral Hospital tur bul an ṭan tirha an ngaihtuahnaa awm pha ngai lo thil thar tam tak khawvel thiamna leh technology-in a ken a awm tawh tih sawiin, "Thil ṭha leh ṭangkai tam tak tih belh tur a awm. ICU-a oxygen khawl siamṭhat ngai pawh a rang thei ang bera siamṭhat a ni," a ti.

Health Minister chuan, khawvel changkang zelah thil thar tam tak a awm reng tih sawiin, "Hospital-a thawkte pawh hmasawn zel tura thiamna an neih belh zel a pawimawh," a ti a, Mizorama damdawi-in lian ber kan neih hi sorkarin ngaihthah loin, tihchangtlun kawngah leh chhawmdawl kawngah theihtawp a chhuah dawn tih a sawi.

Dr R Lalthangliana hian Krismas leh kum thar chibai bûkna atan damlote pualin State Refferal Hospital-a thawktute Rs. 10,000 a hlan a ni.