ZPM Ṭhalaiin HM lawmpuina an hlan; 'Ruihhlo tawlhtute chhut chah kan tum' - HM

ZPM Ṭhalai hruaitute chuan nimin khan Home minister K Sapdanga chu a pisa an hmu a, a department chana hlawhtlinna hrang hrang, a bikin dan loa thil tawlhruk donaa a hmalakna avangin lawmthu an hrilh. Minister chuan, ruihhlo tawlhtu liante chhut chah zel an tum thu a sawi.

Home Minister chuan, ruihhlo doin a rilru a luah hneh thu sawiin, "Tun hnaiah operation lian tak kalpui a ni a, rilru a luah lehzual. Hetiang hun taka lawmthu in rawn sawi hian kan hlawhtlinnaah lawmna a tizual. Operation Trident hlawhtling tak hi tawpsan mai loa ûm zui chhunzawm zel a pawimawh," a ti.

Ruihhlo do a hautak thu sawiin K Sapdanga chuan, "Police leh Excise ringawt tan hneh chi a ni lo. Kan tlawmngai pawlte an ṭangkai hle a, ruihhlo tam tham tak an man a, a hnu lawkah a aia tam zawk mahte man a ni leh ṭhin. A hnuka chhut chah dan kan ngaihtuah a, kan chhui zui zel. Chhui zuina aṭangin Operation Trident a lo awm ta a ni," a ti a; ruihhlo do chu politics-a ṭhatpuina tur lam ngaihtuah loin, ram tana ṭha tur an ngaihtuah ber thu a sawi.

K Sapdanga chuan, Operation Trident chu Ministry of Home Affairs bultum ni mah se, an hmanraw tam ber chu Mizoram Police an nih thu a sawi a, "Tualchhung mite pawh he Operation atan hian an ṭangkai. October 21, 2026-ah central agency-te an rawn thleng a, October 23-ah operation kalpui a ni. Ruihhlo tawlhtu liante'n an hriat miah lohin hmun 38-ah operation an ti thei. Central agency-te'n kan police-te rinawm lo an tawng lo a, mak an ti zawk. Kan police-te'n civil mi an hman zingah pawh rinawm lo an awm lo," a ti.

Home Minister chuan, ruihhlo tawlhtu liante chhut chah tuma hmalakna chu tawpsan an tum loh thu sawiin, "Ṭhalai nunna tam tak kan chhan ang a, chhungkaw tam tak buaina a reh ang. A hlâwkna tél nasa ber tur chu Mizoram kan ni a, state dangte pawhin an tel ang," a ti a; ruihhlo donaah theihtawp chhuahpui zel turin tlawmngai pawlte leh Mizoram mipui a sáwm.

ZPM Ṭhalai president Jeje Lalpekhlua, Home Minister kaihhruaina hnuaiah Mizorama ṭhalaite thla a muan thu a sawi a, "Sorkar hmasa lam aṭang tawhin ruihhlo leh dan phal loh thil tawlhrukna a nasa a, Mizoram ṭhalaite'n kan vei a, sorkar a chêt loh chuan hmalakna a sâwt thei lo. Tunah chuan kan CM leh HM te thawhrimna leh a hlawhtlinna kan hmu chho a, Mizoramah ruihhlo a váng chho zel a ni," a ti.

ZPM Ṭhalai President chuan, "Kuhva leh bungraw dang tawlhruk pawh a kiam chak hle. Mizoram Police recruitment dik leh felfai taka kalpui a ni hian Mizoram ṭhalaite thla a timuang lehzual niin kan hria," a ti a; Home Minister chungah an lawm thu a sawi.