KHAWTHLIR

Thisen pe

Lunglei District Police chuan nimin khan Civil Hospital, Lungleiah thisen pek huaihawtin, thisen unit 10 an pe a, petute mipa pakua leh hmeichhia pakhat an ni.

CM-in bus pe

Chief minister Lalduhoma chuan nimin khan Mizoram Law College hnenah bus thar a pe. CM hian July 31, 2026-a Mizoram Law College Freshers Social a hmanpuinaah bus an mamawh thu an lo thlen avangin bus thar a pek tur thu a puang a; chu chu tihlawhtlingin, nimin khan CMO tualah a hlan ta a ni.

Khet Bachao Abhiyan Campaign

Champhai district Agricultural Technology Management Agency (ATMA) chuan nimin khan Champhai Zotea Tlangcheng Zauah Khet Bachao Abhiyan (Balance Use of Fertilizers) Campaign an buatsaih a, adviser to CM H Ginzalala, Champhai North bialtu MLA-in a hmanpui. MLA chuan, Khet Bachao Abhiyan chu India ram pumah chemical fertilizer hman tlem inzirtirna a nih thu sawiin, loneitute chu chemical leiṭha hmang tlem a, organic leiṭha hmang tam turin a chah.

Apprenticeship Mela

October 27, Thawhlehni khan Serchhip DC Pisapui Hall-ah Pradhan Mantri National Apprenticeship Mela (PM-NAM) buatsaih a ni a, additional DC Dorothy Muansangi'n hun a hmanpui. PM-NAM chungchanga hriat turte inzirtirna hun hman niin, dawrkai/establishment neitute leh candidate-te nen inkawmhona hun hman a ni a; dawrkai/establishment zinga la inziak lut lote chu NAPS portal-ah thun luh nghal an ni.

Contractor ko

Serchhip district bawrhsap Paul L Khuma chuan nimin khan Serchhip district-a National Highway (NH)-02 kawng khuar thawm ṭhat hna thawh mek chungchangah contractor KRAM Infracon Pvt. Ltd. hotute a pisaah a ko a, an hmalak dan a sawipui. Bawrhsap chuan ṭha tak leh uluk taka kawngpui siam turin a chah a ni.