Halpuah hâltu mi paruk man an ni

Krismas 2018 leh 2019 kum thar lawmna vuakvêtah Mizoram pumah hâlpuah leh hâlmawi khap a ni a; chuti chung chuan December 31 zanah hâlpuah ri hriat tur leh hâlmawi hmuh tur a awm nual a, Aizawlah chuan sorkar thupek bawhchhiaa phal loh thil hâltu mi paruk chu police-in an man nia thu dawn a ni.

Thu dawn danin, Krismas vuakvêtah halpuah leh halmawi hâl vangin Chhinga Veng, Aizawl mi nia hriat pathum man an ni a, chungte chu - Lalrinzama (21) s/o Biakthanmawia, Lalhmangaiha (21) s/o Lalhmunmawia leh Lalsawmtluanga (21) s/o Lalchharliana (L) -te an ni.

Police thupuangtu PC Lalchunglura, Aizawl additional SP chuan, Krismas lawmna vuakvetah venhimna tibuai khawp buaina leh harsatna lian tham thleng a awm lo tih a sawi a; Mizoram chhung hmun hrang hrangah dan bawhchhiatna lian tham thleng hriat tur a awm lo tih a sawi.

PC Lalchunglura sawi danin, Krismas urlâwk ní, December 24 khan Aizawl district bikah thubuai pariat ziah luh a ni a; thubuai pathum chu rûkrûk thubuai, silail em, a mu kâp chhuak thei khapna bawhchhia pakhat, MLPC Act hmanga man mi pathum an awm. Motor accident kaihhnawih thubuai pakhat a awm bawk.

December 31, kum hlui thlah zan leh kum thar lawm zan khan Aizawlah hâlpuah hâl vangin mi pathum man an ni a; chu'ngte chu mipa hlîr niin, Lalsavunga Park, Hlimenah hâlpuah an hâl avangin man an ni. Mi pathumte hi Kulikawn Police Station-ah thubuai siamsak an ni a, January 1, 2019 khan Court-an hruai an ni.

December 24, 25 leh 31 zanahte pawi khawihna leh buaina leh harsatna lian tham thleng a awm hriat a ni lo a, Aizawl bakah Mizoram khaw hrang hrangah boruak a rálmuang thawkhata hriat a ni.

Chutih laiin, December 24 zan, zanlai pelh hnu zing dar 1:30 velah College Veng, Aizawla Lalthianghlima in a kâng ral a, thi leh hliam an awm lo. Krismas urlâwk zanah vek hian Aizawl Civil Hospital Casualty chu hliam vanga pantu mi 60 vel awmin, chu'ng zinga paruk chu admit an nia thu dawn a ni.

December 31 zing karah Lalthianghlima (83), Khatla chu ṭawngṭai inkhawma a kal tur tleirawl pali - Khatma mi pathum leh Bungkawn mi pakhatte'n kut an thlak a, kutthlaktute chu police-in an man tawh a, kum tling lo vek an nih avangin Observation Home-ah dah an ni.