MJA-te'n bawlhhlawh sâwngbàwlna tlawh

Mizoram Journalists' Association (MJA), Serchhip District member-te chuan nimin khan Serchhip leh Serchhip district-a khaw ṭhenkhatte bawlhhlawh sâwngbàwlna hmun, Solid Waste Management Centre (SWMC), Lungrual Ram, New Serchhipa mi an tlawh.

MJA member-te hi UDPA department-a sanitation inspector Obed Lalhuliana leh bawlhhlawh sâwngbàwlna enkawltu Green Herd Pvt. Ltd. manager Samuel Lalmuanpuia ten an lo dawngsawng a; hna an thawh dante an lo hrilhfiah bakah, MJA member-te zawhnate an chháng.

Serchhip SWMC enkawltute chuan, bawlhhlawh ṭawih thei zingah ṭawih thei lo paih tel a awm ṭhin a, chu chu an harsatna tawh ṭhin a nih thu an sawi a; bawlhhlawh ṭawih thei leh ṭawih thei lo paih pawlh lo turin mipui an ngen.

Serchhip SWMC-ah hian August 4, 2025 aṭangin bawlhhlawh sâwngbâwl a ni a; ṭawih thei lote sawngbawl niin, ṭawih theite chu Dawngzawla UDPA bawlhhlawh paihna hmunah paih ni. Bawlhhlawh chi hniha thliarna - Chhiahtlang North leh South bakah, bawlhhlawh chi lia thliarna New Serchhip North leh South bakah, district chhunga thingtlang khaw 24-a bawlhhlawhte sawngbawl a ni.

MJA member-te hian UDPA-in bawlhhlawh sawngbawlna hmun tur an sak mek an tlawh nghal. Building sak zawh thawkhat a ni tawh a, ni tin bawlhhlawh ton 8 sâwngbawl thei tura duan a ni. MJA member-te chuan, bawlhhlawh sawngbawlna hmun thar tur hi peih thuai ṭul an tih thu an sawi.